Praktika për studentët dhe ekspertizë në teknologji informacioni, UMSH marrëveshje me “ Infosoft Group”

Universiteti Mesdhetar i Shqipërisë nënshkroi marrëveshjen e bashkëpunimit me “Investment Joti- Infosoft Group”, grupi që prej 27 vitesh udhëheq  distribucionin e produkteve të konsumit dhe teknologjisë së Informacionit  në Shqipëri. Ky grup është sot një nga sipërmarrjet më të mëdha që angazhon profesionistë të klasit të lartë me ekspertizë të gjerë në fushën e tyre respektive, dhe përbëhet  nga njëmbëdhjetë kompani. Studentët e UMSH-së tashmë do të kenë mundësinë të kryejnë praktikat mësimore,  pranë kësaj shoqërie e cila zotëron tregun prej disa dekadash. Kjo marrëveshje, vjen në  vazhdën e marrëveshjeve që Universiteti Mesdhetar i Shqipërisë, duke pasur  synim  të rrisë dhe përmirësojë cilësinë e mësimdhënies, familjarizimin e studentëve me  tregun e punës, ka përfunduar nëpërmjet bashkëpunimit me institucionet publike dhe private. Presidenti i “Investment Joti- Infosoft Group”,z. Grigor Joti,  u prit nga themeluesi i Universitetit Mesdhetar Akademik, Prof. Dr, Anastas Angjeli dhe studentë e pedagogë të UMSH-së. Sipas marrëveshjes, Shoqeria “Investment Joti- Infosoft Group” do të angazhojë, sipas një plani të caktuar, studentë dhe të diplomuar të UMSH në punë provuese (stazhe). Kjo  shoqëri  në kuadër të veprimtarisë së vet, do t’ju mundësojë studentëve të UMSH-së, kryerjen e praktikës profesionale të parashikuar në planin mësimor. Ekspertë të shoqërisë “Investment Joti- Infosoft Group” veçanërisht në fushën e IT, do të kenë mundësinë të mbajnë në UMSH leksione për studentët  si dhe  të dyja palët do të realizojnë veprimtari të përbashkëta kërkimore, promovuese dhe marketingu, me qëllim rritjen e cilësisë, imazhit të institucioneve respektive si dhe sensibilizimin e qytetarëve  me projektet e përbashkëta të dy institucioneve. Themeluesi i Universitetit Mesdhetar të Shqipërisë, Anastas Angjeli e vlerësoi këtë marrëveshje si mjaft të rëndësishme, duke theksuar se modelet e shoqërive të tilla të suksesshme i shërbejnë studentëve si mundësi jo vetëm për praktikat, por edhe si një dritare më shumë për tu punësuar nëse vërtet kanë potencialin që i përshtatet shoqërisë. Presidenti i “Investment Joti- Infosoft Group”,z. Grigor Joti,pasi bëri një prezantim të grupit që drejton, nënvizoi se rekrutimi i të rinjve të aftë  ka qenë prej vitesh një  prioritet i pandryshueshëm.


Zv. Kryeministrja , Senida Mesi me studentët e Universitetit Mesdhetar të Shqipërisë: Si po reformohet administrata publike


Zv. Kryeministrja Senida Mesi, ishte sot e ftuar në Universitetin Mesdhetar të Shqipërisë, për të mbajtur një leksion të hapur për studentët me temë “Reforma në administratën publike, prioritet kyç për integrimin europian”.Në ligjëratën e saj Zv. Kryeministrja, u ndal në hapat që po ndërmerren për  riorganizimin e  administratës publike,për të arritur ato standarde që na afrojnë me BE-në. Qëllimi kryesor i  reformës, është rritja e cilësisë së shërbimeve që ofron administrata publike, duke u larguar sa më shumë nga burokracitë dhe duke i shërbyer qytetarëve me profesionalizëm. “Reforma ka filluar  me riorganizimin institucional, rishikimin e funksioneve të të gjitha institucioneve dhe agjencive të varësisë, me qëllim ristrukturimin e tyre, për të rritur efiçencën, duke  rindërtuar  nga themelet marrëdhënien e qytetarit”,  u shpreh zv. Kryeministrja.  Në ligjëratën e saj,  ajo renditi si shumë të rëndësishme shtimin e  numrit të shërbimeve publike online që do të kontribuojnë në modernizimin dhe uljen e korrupsionit,  apo edhe përmirësimin e cilësisë së shërbimeve publike. Duke iu përgjigjur interesit të studentëve, zv. Kryeministrja theksoi se në institucionet shtetërore praktikat profesionale të studentëve  të cilat kryhen në një periudhë kohore prej 6 muajsh, kanë sjellë një frymë të re në administratën publike, pasi të rinjtë vijnë me dëshirë për të punuar. Universiteti Mesdhetar i Shqipërisë ka marrëveshje bashkëpunimi me pjesën më të madhe të institucioneve publike dhe private. Në sajë të këtyre marrëveshjeve, studentët kryejnë intershipe, trajnime dhe  praktikat mësimore  duke pasuruar cv-të e tyre  ende pa përfunduar shkollën e lartë. Themeluesi i Universiteti Mesdhetar të Shqipërisë Akademik, Pr. Dr. Anastas Angjeli, duke falenderuar Zv. Kryeministren për ligjëratën e saj, u shpreh se me një administratë publike profesionistë, Shqipëra do të integrohet më shpejt në Bashkimin Europian. “Kualifikimi i të rinjve, ndryshimi i mentalitetit dhe kulturës së punës, paralel me politikat që duhen ndërrmarrë do ta bëjnë këtë proces më të lehtë “, u shpreh z. Angjeli. Reformimi i administratës publike është një nga 5 prioritetet kyçe të cilat Shqipëria duhet të përmbushë për hapjen e negociatave për anëtarësim në BE dhe po  do të mbikqyret nga një grup i përbashkët i qeverisë shqiptare dhe përfaqësues të të gjithë vendeve të Bashkimit Europian.


Marrëveshja, Universiteti Mesdhetar do shkëmbejë studentë me Universitetin e Durrësit


Universiteti Mesdhetar i Shqipërisë dhe Universiteti “Aleksandër Moisiu”,i Durrësit, nënshrkuan sot  marrëveshjen e  bashkëpunimit në fushën e arsimit dhe kërkimit shkencor.  Sipas kësaj marrëveshjeje, dy universitetet do të  inkurajojnë  kontaktet  e drejtpërdrejta  dhe  bashkëpunimin  ndërmjet  anëtarëve  të personelit  akademik  të fakulteteve, departamenteve, institucioneve kërkimore dhe studentëve. Aplikimet për shkëmbimin e studentëve, nga sa përcakton marrëveshja  do të zhvillohen nga dy universitetet  mbi baza reciprociteti  brenda të njëjtit vit akademik.  “Studentët e shkëmbyer do të pranohen për një periudhë  që zgjat një ose dy semestra  dhe për një periudhë maksimale prej një viti akademik”, përcakton marrëveshja.  Sipas saj, studentët  e shkëmbyer  mund të ndjekin  lëndë për të marrë kredite dhe institucioni  pritës duhet  të  lëshojë  një  vërtetim, në  të  cilin të shënohen  notat  e  marra  për  studentët e shkëmbyer në përputhje me të njëjtat rregulla dhe rregullore që zbatohen për studentët  e regjistruar normalisht. Institucioni pritës nuk  do të aplikojë pagesën e shkollimit për studentët e shkëmbyer. Studentët  e shkëmbyer  duhet  të  rekomandohen   nga  institucioni dërgues  dhe  duhet  të ndjekin rregullat dhe procedurat e përcaktuara  nga institucioni pritës. Themeluesi i Universitetit Mesdhetar, Akademik, Prof. Dr Anastas Angjeli dhe Rektorët e Universitetit të Durrësit znj. Kseanela Sotirofski dhe UMSH. z.  Nexhmi Dumani, e cilësuan këtë marrëveshje mjaft të rëndësishme, në kuadër të  ofrimit të një cilësie edhe më të mirë në arsimin e lartë publik dhe privat, duke i krijuar studentëve dhe stafit akademik më shumë hapësira. 

 

 

 




 


Memorandumi, studentët e UMSH trajnime dhe këshillim karriere nga The HeadHunter

Kompania më e madhe e punësimit në rajon

zgjedh UMSH si partner në projektin e USAID “People first”

 

Studentët e Universitetit Mesdhetar të Shqipërisë do të trajnohen dhe do të mund të sigurojnë mundësi punësimi nga një prej kompanive më të mëdha jo vetëm në Shqipëri por edhe në rajon, The HeadHunter. Kjo kompani  ofron shërbime inovative në përzgjedhjen e personelit dhe rekrutimit dhe  ka zyrat e saj në Shqipëri, Kosovë, Bosnje dhe Hercegovinë, Mal të Zi, Maqedoni, Serbi, Greqi dhe SHBA. Vetëm vitin e kaluar në Shqipëri nëpërmjet kësaj kompanie u punësuan mbi 7000 persona. Drejtuar nga Elton Ilirjani, ndër studentët e parë të Universitetit Mesdhetar, The HeadHunter ka përzgjedhur UMSH, si partnerin e saj kryesor në Projektin “People First” financuar nga USAID dhe Ambasada Suedeze në Shqipëri. Për këtë qëllim u nënshkrua memorandumi i bashkëpunimit mes Universitetit Mesdhetar të Shqipërisë dhe  The HeadHunter shpk dhe në sajë të tij, studentët e UMSH do të kenë mundësi të trajnohen për tetë profesione të Hoteleri – Turizmit. Ky bashkëpunim, do të sigurojë ofrimin e kurrikulave sipas standardeve bashkohore dhe nevojave të tregut në sektorin e turizimit, rritjen e numrit të të rinjve që do të trainohen dhe si rrjedhojë, rritjen e numrit të të punësuarve në fushën e Turizmit. Shkëmbimi i ekspertizës ndërmjet The HeadHunter dhe Universitetit Mesdhetar të Shqipërisë, do të shërbejë për të krijuar një urë lidhëse midis këtij të fundit dhe Biznesit Privat në Sektorin e Turizmit, dhe institutcionalizimin e marrëdhënies midis tyre.Gjithashtu, në kuadrin e zgjerimit të bashkëpunimit mes The HeadHunter dhe UMSH, u nënshkrua njëkohësisht edhe një marrëveshje bazuar në të cilën, The HeadHunter do të ofrojë pranë UMSH këshillimin e karrierës për studentët e këtij Universiteti, duke i orientuar ata drejt një qasje profesionale në procesin e punësimit.